أولي القرارات الرئاسية

أولي قرارات الريس

بما إني هبقي الريس يعني هبقي الريس .. سواء فردة أو بخاطر شعبنا الحبيب الغلبان .. اللي لا له لا في الطور ولا الطحين – قررت قرارات فردية (طبعا لأن مفيش واحد غيري أهل إنه يكون ريس ) تـكون لنا عونا وزخرا بمجرد استلام العرش ( قصدي الحكم ) وهذه القرارات مصيرية تحدد مستقبل شعبنا وحاضره ، قررت أنا ملك مصر ( قصدي رئيس مصر ) اللي جاي ، عمل كل من الآتي :

1- لابد أن نغير من شكل الجنية ( اصله شكله وحش ومش عاجبني ) .

2- لابد من افتتاح شركة محمول رابعة ( عشان اتكلم براحتي مع الريسا اللي زي بقي ) .

3- عمل حملة توعية شاملة جميع المدارس والحكومات بضرر المظاهرات سواء ضرر جسدي أو نفسي .

4- شراء نادي كبير زي ريال مدريد ( إن شالله ب 100 مليار دولار ) عشان يلعب باسمنا بره ، وكمان عشان الدوري يحلو – آه – يبقي والله عندنا ريال مدريد والأهلي .

5- كل من تسول له نفسه ويهم أن يهز رمز المملكة ( قصدي الدولة ) المتمثل في شخصي – ده هيتنفخ هيتنفخ لامحاله وده أمر مفروغ منه .

6- جعل الثانوية العامة بفلوس – زي الجامعات الخاصة – وللريس 25% نسبة ( ودي ضريبة الرياسة ) .

7- افتتاح سيبر ( يعني مركز كمبيوتر كبير شوية بس حلو ) كل 100 متر – عشان الشعب ينفتح علي كل الشعوب المجاورة .

8- مساعدة الشباب في الهروب للعمل بره ( علشان تعرفوا أنا بحب شعبي قد إيه ) .

9- حبيب العدالي لازم يمسك الداخلية ليه بقي – عشان المتربصين والمتأمرين والخونة – مع إني عارف إنهم شرذمه وقله قليلة ، ومش عايزيني أمسك الحكم عشان مصلحة الدولة .

10- جعل تسعيرة السجاير موحدة عشان البقالين اللي بيضحكوا علي العيال الصغيرة ويبعوا لهم السجاير غالية .

11- نرجع بقي شكل الجنيه تاني ( اللي هو القديم ) اصل شكله الجديد احتمال ما يعجبنيش .

12- بالمرة نشتري برشلونة – امال هنسيب الريال ياخد الدوري لوحده .

13- طبعا مش هقول للسادة المواطنين اللي هيحط صورتي علي يافطة المحل بتاعه مش هيدفع ضرايب .

14- عمل مسابقات SMS علي أي حاجة ( طبعا محتاجين ليها شركة محمول خامسة عشان الضغط اللي هيكون علي الخطوط ) .

15- طبعا لازم العلم يتغير بما أني ريس فنان وموهوب .. انا بقترح يعني .. ان العلم يكون بنفسجي مشبح بأحمر ويكون كده في مربع في النص بالبابمبي وصورة – فرخة – والفرخة تدل علي صمود هذا الشعب في وجه الطغاة و ان الشعب شبع خلاص في عهدي المجيد ( كلكوا عرفين طبعا إنه ده مجرد اقتراح إجباري ) – وان شكل العلم الجديد – قرار مصيري – يحدد ما ستكون امتنا في الفترة القادمة .

وفي النهاية لا استطيع الا أن أقول وأنا الدمعة هتفر من عيني .. عاش الملك .. قصدي الرئيس .. عاش الرئيس .. عاش الرئيس .

والسلام عليكم ورحمة الله وبركاته ... شكرا شكرا أيها الشعب .