مش بالساهل برضه

يبدو إن موضوع الرئاسة مش سهل زي ما كنت فاهم ، دي طلع فيه مؤتمرات واجتماعات وقرارات وحاجات كتييييييييير تانية ، وكل كوم ولو جه رئيس دولة رزل أو غلس كوم تاني ، هيخنق فينا ويا سلام لو طلع دماغه مقفلة شوية هيركبني العصبي ، وبيقولك لازم اتعلم كام لغة علي الماشي – وبصراحة حاولت أتعلم وكان ليا صولات وجولات في ( كيف تتعلم الروسية في اسبوع – وكيف تتعلم الألمانية في 15 يوم )كل الكلام ده مكلش معايا ولا حتي برغيف عيش من بتاع المخابز الحكومي – وده إن دل يدل إنا احنا لازم نقاطع البلاد اللي أنا معرفتش اتعلم لغتها – لأن البلاد دي متآمرة علي مصالح دولتنا العظمي – مش كده ولا ايه .

ده غير لما تلاقي فيه مظاهرات كل يوم بتندد إن DSL ( الي هيا وصلت النت بس سريعة شوية واشتراكها 20 جنية ) بقي بطئ – والشعب مش عارف يعمل Download – والناس نزله مظاهرات في الشارع تطالب بإسقاط الحكومة وعايزين راس كبير الحكومة ( احمدك يا رب إني الريس لأن الحكومة تبدأ عندنا من رئيس الوزرا ) وأنا نزولا عن مطالب شعبي الحبيب ، أشيل رئيس الوزرا وأجيب واحد يرجع DSL زي ما كان ( خلي الشعب يعيش )

ومن صعوبة موضوع الرئاسة برضة الموكب المتواضع بتاعي – مش عارف اخليه كام عربية بالظبط – وهل أحط قناصة علي العمارات والبيوت .. والله ما انا عارف .. بس طبعا برضة لأزم أهتم بالأمن عشان ايه بقي !! ميحصل فيا زي اللي حصل في غيري ( طبعا أنا مش عبيط عشان أقول لكم إني قصدي علي السادات )

طب بالنسبة للأكل مين اللي هيطبخ ليا .. وإيش ضمني إنه مش هيروق علي الأكل بتتبيلة سم معتبرة اللي من نوع ( هتتظبط .. يعني .. هتتظبط ) – ده موضوع الرياسة ده طلع موال .

واخد مرتبي ازاي وكام ؟؟ معلش برضه أنا عايز أعرف المرتب هيكون كام يعني – ما هو الواحد قبل ما يشتغل شغلانة لازم يعرف هيقبض كام .. وهل يا تري إن أنا الريس هروح أقبض من شباك الموظفين ولا ايه .. ويا تري المرتب هيقي بالنسبة زي ما بسمع ولا هيكون ثابت بقي وفيه بدلات وحوافز و خصومات و اوفر تيم - وهل في أوقات عمل رسمية ولا مشية كده بالهبلة ( يعني بالبركة ) .

ده غير الإنقلابات ويبدو إن احتمال كبير يكون فيه إنقلابات علي الحكم ؛ بسبب إن الأهلي ممكن ما يا خدش الدوري – والزمالك مش عاجبه إن الحكم بأمر ملكي ( يييه قصدي رئاسي ) مني خلي الماتش بقي 180 دقيقة ( واحد من الشعب مش بيفهم في الكورة زي يقولي ياريسنا يا حبيبنا ايه اللي خلي الماتش من 90 دقيقة بقي 180 .. والرد عليه هيكون كالتالي ( أيها المواطن من أجل الإنسانية جمعاء – يعني مع بعض – حبيت أعرف هو أخرة لاعبي الصحية كام دقيقة ؛ والسبب إني سمعت إشاعة إنهم بيتدربوا في الكافي ( يعني القهوة )– أيهم نفسه أطول – فقلت أشوف مين اللي نفسه أطول – ومين اللي بيتدرب صح – " أيها المواطن هل أنت من المؤيدين لحكمي وحكومتي أم أنك لا قدر الله من المعارضين " .

وتلاقي مظاهرات في عهدي – قال ايه – الشعب بيطالب إن رغيف العيش بتاع المخابز الحكومية يرجع تاني ؛ والتبرير إنهم زهقوا من اللحمة والعيش الفينو والدست ( حرف الدال ده بيحرجني دايما ) عفوا التست .

يا تري هواجه كل الصعاب التي تمر بها دولتي إزاي ( علي فكرة الياء في دولتي دي ياء الملكية ) واللي مش عاجبه ولا حاجة مفيش قدامه إلا حجتين ( إما البحر – أو – الحيطه ) وعلي المتضرر أن يختار عشان تعرفوا إني رئيس " ديمقراطي " مش هي بتتكتب كده برضه .