أولا : مفيش أولا
ثانيا : الخلافات الزوجية تنم أحيانا عن غباء فكري مطلق ، مفيش نقاش إلا وتلاقي الزوجين بيعيروا بعض ، المشكلة مش في المعايرة ، المشكلة إن الخناقة غالبا بيكون فيها تطاول واللي يقهر إنها تكون قدام العيال .
ثالثا : استكبار كل طرف إنه يقول أنا آسف للتاني ، في إيه لو واحدة زعلت جوزها تقوله أنا آسف ، في إيه لو الواحد لما يزعل مراته يجيب ليها ورده ، كنت بقول الفكرة دي لمدرس محترم معايا في المعهد ، قالي إنت عايش في عالم لوحدك ، أنا اشتري لها وردة لما يكون مرتبي محترم ، ولو جبت الورده حتي هتقولي مش أولي كنت جبت بضتين ، بس الاستاذ حازم رد عليه ، هتقولي حازم مين هقولكم إنتوا عرفتوا احمد عشان تعرفوا حازم ، بس يا جدعان هو برضوا مدرس قال : مش شرط وردة ممكن كرملايه حتي أو شيكولاتيه عادية الست بتنبسط من كدا .
ورغم كدا أنا من ضمن رافضي إن واحدة تقعد مع جوزها بسبب العيال مع إن جوزها جزمة قديمة ومتخلعش من الرجل وميستهلش ضفرها ، وضد إن واحد يستحمل واحدة متسلطة أو لتاته أو شكاية عشان العيال وجهة نظر إن لو مفيش أمل في إصلاح عيوب ضخمه في الطرف الآخر يبقي الإنفصال هو الحل مع إنه أبغض الحلال ، لأنه أفضل من تدمير الأطفال بوجودهم في أجواء هتخليهم أشخاص مش أسوياء .
يا جدعان حولوا تختاروا ذات الدين اللي بيفهموا من البنات والشباب ، حاولوا تقروا وتطلعوا علي كيفية ترتيب حياتكم ، حطوا تصورات ، و عارف إن الجواز مش بالقراية ، بس في مشاكل ممكن تتحل نتيجة فكرة سمعتها أو قرتيها ، الجواز تفاهم ومشاركة تنازلات بتتقدم بس التنازلات طبعاً متكونش ضد الدين ، أنا مش عارف أنا بكتب إيه دلوقتي لأني مضيع بس أهم حاجة أعمل الواجب حتي لو مطلعش حلوا .
* * * * * * * *
علي الهامش
- الدورة التأهلية في الحياة الزوجية
- برنامج النفس والحياة جامد جدا ( علي قناة الرسالة بس بيحتاج تسجيل بالموقع أولا )
- دورة تأهلية للقيادة – أيوا القيادة لأن إدراة الزواج عايزة قائد -
هناك 8 تعليقات:
اقترحت فى أحد مواضيعى الخاصة بالزواج أن يشترط فى قسيمة الزواج أن يكونا الزوجين قد تلقى كورس فى كيفية التعامل ومعرفة حقوق كل منهما وواجباته تجاه الآخر.. لعل صوتى يصل
يا ريس
من سنتين كنا بنتفق مع واحد صاحبنا ناخد منه ميعاد عشان نبارك له بعد الزواج
ولما اتصلنا به بعد 3 اسابيع قال انه طلق مراته
هو في ايه
هو الجواز والارتباط عايز كتالوج
للأسف لا
العيب في سوء الاختيار والتربية الغلط
للشباب وانانية البعض منهم والتسرع
ربنا معاكم يا شباب اليوم
انت بتقول كلام زى الفل
بس ده للى عايز يتجوز
المهم انى اول مره بزورك
وان شاء الله مش الاخيره
ابقى تعالى نورنى بقى فى حكاوينا
هى مش حكاوينا ولا حاجه
هى حكاويا لوحدى بس ده ميمنعش
تسلم ايدك يا جميل
كلامك مظبوط ياريس .. هما تقريبا بينسوا الايه الكريمة "ومن اياته ان خلق لكم من انفسكم ازواجا لتسكنوا اليها وجعل بينكم مودة ورحمة"
اظن ان اكتر حاجه تفسد العلاقة بين الراجل والست هى الاهانة وعدم الاحترام لما بيحصلوا بينكسر الجسر اللى مابينهم وعمر الجرح اللى بيسببه الكلام اللى من النوع ده مابيلتئم .. حتى لو الزواج تقليدى ومفيش حب لازم يبذلوا جهد علشان تتغير الحالة دى لان برده اظن انهم بيلجأوا للطلاق بسبب شعورهم انهم عايشين مع غريب .. ربنا يهديهم ويرزقنا الزوج والزوجة الصالحة ياريس.
نصايحك كترت اليومين دول .. ربنا يستر :)
متفقة معاك فى كلامك
حاجات كتير غلط بتحصل بس والله مش بيبقى سبها الزوج لوحده او الزوجة لوحدها
الاهل بيبقوا الاساس
يعنى مثلا لو البنت عندها مشكلة مع زوجها ممكن تلاقى امها بتسخنها عليه بدل ماتهديها وتخليهم يتفاهموا
وام الزوج اللى ربت ابنها على ان هى واخواته البنات يخدموه طول عمره فلما يتجوز يبقى شايف ان مراته شغالة جديدة عنده
لو الاتنين متفقين مع بعض من الاول وكل واحد صارح التانى بعيوبه الحياة ممكن تكون افضل والمهم يحلوا مشاكلهم بعيد عن العيال لان فى النهاية كل بيت فى مشاكل
السلام عليكم اخى بسام لماذا قمت بحذفى من الفيس بوك؟؟؟هل صدر منى اى حرف يسبب لك اى ازعاج؟؟انا حزينة جدا لما فعلتة لا استحق منك هذا ابدا وخصوصا انى اكن لك كل احترام وود عموما لااحد يفرض نفسة عليك لك كل الحق ولكن هذا اعتبرتة غدر واهانة وخصوصا انك على دين وخلق ولا ازكيك على الله فسبحانة اعلم بمن اتقى...
إرسال تعليق