المهم مره كنت ماشي قاعد أسبح ، والحالة الروحانية عاليه شويه ، وهايم وملعلع في التسبيح " سبحان الله والحمد لله والله أكبر "، وبالتعود طول ما انا ماشي - كل اللي قابله اقوله السلام عليكم - ويبدو إنك كنت بقول بصوت واطي فبعض الناس مكنش بيرد السلام وده غريب في قريتي ، المهم واحد صاحبي نبهني لصوتي الواطي - قلت بس أنا اللي أأبله دلوقت أقوله السلام عليكم بصوت عالي - وقفت قدام الناس وقلت بصوت جهور ولا صوت بن عباس " الله اكبر " بدل من " السلام عليكم " الناس قعدت تبص لي قوي ، وانا وشي ضرب لون احمر مع إنه قليل عندي ، وخدت ديلي في سناني و يا فكيك علي البيت علي طول .
مرة تانية كنت بكتب في استمارات الثانوية العامة اللي بنعملها في تانية ثانوي دي ، المهم المدرس اللي دخل علينا كان بعيد عنك جهول وغليظ ويبدو إنه ميعرفش طريق لمعني كلمة الرحمة ، سواء كان معني لغوي أو تطبيقي ، المهم قال لنا " اللي هيغلط في الإستمارة في كلمة هيدفع جنيه " قلت في عقل بالي " يا استاذي العزيز عض قلبي ولا تعض رغيفي " ، لقيت واد رفع ايده للاستاذ وبيقوله " انا غلطت في كتابة كلمة يا .... ، لسه الواد ماكملش كلامه لقيت المدرس كانت ايده بعلو السقف وهبد الواد حتة قلم مشفتش زيه قبل كده ولا حتي في الأفلام الهندي ، أنا شفت المنظر قلت " بس دلوقت لو غلطت هتبدهل ولا بهدلت المصري في قسم الشرطة ، أما لو نقلت من اللي جنبي مش هغلط .
اللي جنبي كتب الإسم : احمد طه أبو شحاته ، قمت كاتب الإسم : أحمد طه أبو شحاته .
كتب تاريخ الميلاد : 25/3/88 ، قمت كاتب زيه بالضبط ، ثم اكتشفت بالصدفة البحته إن اسمي : أحمد أحمد أبو سيف مش أحمد طه ، وبتطبيق نظرية النسبية لقيت إن تاريخ ميلادي 11/5/88 ، ويبدو من الخوف محبتش أغلط فنيلت الدنيا ، قعدت أحسب في الغلطات لقيت نفسي هتكلف " بما لا طاقة لي بها " وعدفع ولا 20 جنيه وإن الضرب هيشتغل فيا للصبح " لحد لما يبان ليا صحاب " ، قعدت أدعي الله أن يجعل المدرس من الذين من بين ايديهم سداً ومن خلفهم سداً فلا يري ما صنعت يدي ، طبعا لا قلت للمدرس إني غلط ولا حاجة وشطبت علي اللي أنا عملته بسرعة و لما خلصنا تقريبا حطيت استمارتي وسط استمارات زميلي في الفصل و " سكتم بكتم " " ولا من شاف ولا من دري " .
الحكاية الثالثة ولا بلاشي كفاية كده عشان شكلي طولت عليكم حبيتين والسلام عليكم ورحمة الله وبركاته يا شعبنا الطيب ( اللي مش هيضحك سنة حبس مع الأشغال الشأه المؤبدة أنا بقول اهه )
هناك تعليقان (2):
هاهههاهههههههها ها ها ها هههههههههه
... زي العسل والله .
ربنا يخليك للشعب وكلنا معاك يا ريس
الله يخليك يا أستاذ وائل .. أنا أسف علي التأخر في الرد .. بس والله ماشوفتوش .. ومحتاس لأن أيام الإمتحانات بدأت .. فإدعلي لي
إرسال تعليق