وزارة الأفكار

قرار واحد من رئيس الجمهورية – اللي هو انا – " قول إن شاء الله " ، بعمل وزارة للأفكار وتنقيحها وتهذيبها ، واقر بذلك وأنا أمام شاشة الكمبيوتر ال 20 بوصة – اللهم لا حسد – فالأفكار هي المحرك الرئيسي لسيارة الحياة ، فهناك اناس تحيا لفكرة ، و أناس تحيا بفكرة ، و أناس تحيا لتحقيق فكرة ( أعرب كلمة فكرة في الثلاث جمل السابقة ) .

ويبدو بدون زعل يعني ، إن مخ الشعب عايز صنفرة حداد ، عشان نشيل الجلخ اللي عليه ( جلخ َ، يجلخُ ، خلخاً ) – انا قلت بدون زعل – لازم نواجه الحقايق ، لابد لنا أن نحيا بأفكارنا ، لابد لنا أن نحرك الماء الراكد في عقولنا ، ربما يتذكرنا التاريخ بحاجة غير السك علي قفانا – وبدل ما التاريخ يهدي للشعوب العربية أغنية " أه يا قفي " ، يقول علينا : " والله الناس رغم رزلتهم وغلستهم وتلمتهم ، إلا أنهم كانوا أصحاب فكرة " .

وزارة الأفكار دي طبعا هتكون وزارة متخصصة ( أي واحد يفكر أنه هينزل قدامي للرياسة هيتنسف ) – متخدوش في بالكم اللي بين القوسين دي فكرة جات في دماغي علي الطياري كده – وزارة متخصصة في تعديل الأفكار ، في تطوير الأفكار ، في صناعة الأفكار .

وزي ما قال واحد من الحكما مش عارف هو مين " أنا أفكر إذا أنا موجود " أنا بقي هعمل زي الشريك المخالف " أنا موجود إذا أنا بفكر علي طول " ، موضوع الأفكار ده موضوع كبير ، موضوع خطير ، لازم كلنا نهتم وإن شاء الله هتكون الوزارة شعارها " فكرة زغنطوطة هتكون معانا فكرة كبيرة خالص – معنا – تسطيع أن تفكر بلا قيود " .

كل بيسأل طبعا يا فخامة سعادة جناب حضرة المبجل رئيس دولة جمهورية مصر العربية اللي جاي إن شاء الله : هي الوزارة اسمها هيكون أيه ؟ وأقوله بعد السلامات والتحيات والقبلات الحارات " مكتبة الأسرة " – قصدي – وزارة الأفكار ، و أشوفكم في أمن الدولة ، وسمعني سلام " أودعك " مع دخلة " يا عيني يا عيني يا عيني علي الوالا " .