من الله عليا بتجديد عقد عملي " كمدرس حاسب متعاقد " بعد أنا كدنا نأخذ " زومبا " ودنا نفصل عشان ينشروا في الجرايد " إن فيه فرص عمل جديدة ولكن ظل راتب الوظيفة لنا بالمرصاد 250 جندي فقط لا غير حتي لو طبق الحد الأدني ، ومع أننا لسنا علي درجة مالية يتم اختصام 27.5 فقط لا غير تأمين ومعاشات مع العلم أنه لا يوجد تأمين ولا – دياولوا – ولا تسألوني عن دياولوا لأنني بالتأكيد لا أعرفه شخصياً ، طب بيخصموا ليه ؟! الله أعلم ، وصدقوني إني شاكك أنه يأخذوا منا ضريبة مبيعات
متوسط المواصلات 42 جندي شهريا فقط لا غير ، والأكل مع المدرسين يكلف 30 جندي شهريا فقط لا غير ، وإذا لم يغرني شيطاني لكوباية الشاي سأوفر منها 4 جندي شهريا فقط لا غير .
سرح خيالي لبناء شقة عشان أتأهل ستكلف متوسط 140.000جندي فقط لا غير من بناء وتشطيب وخلافه ، وبقسمة الباقي من الخصم والمواصلات والأكل والشاي سأحتاج 924 شهراً فقط لا غير = 77 سنة فقط لا غير .
ندخل بقي في تفاصيل الشبكة :
15000جندي شبكة فقط لا غير و مهر 25 قرش فقط لا غير علي أساس إنه أقل عمله موجوده في السوق ومأذون هيلطع مني 250 جندي فقط لا غير وقول يا عم مش هنعمل فرح للتوفير مع إني والله كان نفسي أدبح كام عجل فقط لا غير عشان أولم يعني وأقضي شهر العسل بنعمل عمره بس كل دي رفاهيات سيبكوا منها ، إذ المجموع 15000 فقط لا غير + 25 . فقط لا غير + 250 فقط لا غير = 15250.25 جندي فقط لا غير بالقسمة علي 151 جندي فقط لا غير باقي الخصم والمواصلات و الأكل والشاي اللي مش بشربه للتوفير = 101 شهر فقط لا غير = 8.5 سنة فقط لا غير
بجمع 77 سنة فقط لا غير + 8.5 فقط لا غير = 85.5 سنة فقط لا غير ، شوفتوا كنت هنسي حاجة مهمة الحكومة بتدي بدل جواز 2.5 جندي فقط لا غير في الشهر ، نحسبها من الأول ، ولا بلاش عشان أنا زهقت منكم أصلا .
ملحوظة هامة جدا :
مطلوب عروسة مش بتاكل فقط لا غير ، ومفيش تصبحوا علي خير
