مصر واقفه علي الحرف

يبدو أن دلائل غباء الروتين في المصالح الحكومية لا ينتهي أبدأ ، وبداية الحكاية عندما اكتشف الموظف القابع علي مكتبة سر خطير وهو إن اسم الأم في شهادة ميلاد الأخ للعبدلله اللي هيروح الجيش ناقص حرف وذلك في القيد العائلي اللي ملوش لازمة أصلا في ورق الجيش ، هووووووووب ، قام مرجع الورق ، وقالي اطلع علي السجل المدني هات نموذج 24 ، رحت السجل قال لالالالالالالالا ،دا اخواتك مواليد خارج فلازم تطلع القاهرة عشان تصلحه من المركز الرئيسي ، رحت المركز قالي قدم طلب ، قدمت ، قالي تعالي بعد 30 يوم من تاريخه – اوعوا توهوا وأنا بحكي الحكاية – رحت بعد 34 قالي ، أنا آآآسف ، اصل العيد جهه في النص و فيه اسبوع ما تحسبش ، المهم ال 30 يوم بقوا 60 ، رحت عشان أجيب التصحيح القيه لسه مخلصش ، غضبت ، وفي ثانية اللجنة اتشكلت وقررت تصحيح اسم الأم في شهادة ميلاد الاخ وذلك بعد طلبي مقابلة المأمور اللي ماسك المركز ، وعشان مفتكوش في الكلام واحد خلص ورقة هناك بعلبتين سجاير ملبوروا حمرا .

****

راجع بلدي وانا منتصر اخيرا حصلت علي التصحيح رحت بيه مركز الإصدار التابع ليه قالوا لي لالالالالالالا ده نموذج 24 احنا عايزين نموذج 100 ، ارجع تاني علي القاهرة .

***

رجعت ردوا وقالوا الالالالالالالالا احنا مش بنطلع غير نموذج 24 اطلع علي مصلحة الشؤون القانونية لمصلحة الأحوال المدنية ، رحت قالي التصحيح لمين قلت له لاخويا قالي طب هوا فين ، قلت مسافر ليبيا ، قالي لالالالالالا زات في التحرير هات جواب تحركات ، رحت الجوزات قالي لالالالالا احنا عايزين توكيل من اخوك انك هتعمل جواب تحركات له ، بعد مرور الأسبوعين وصل التوكيل ، طلعت بيه علي الجوزات اللي انا تابع ليها ، قالي لالالالالالالالا لازم جهه رسمية تخاطبني انك عايز تعمل جواب تحركات ، في النهاية أنا سبت ورق الجيش واللي يحصل يحصل وايكش تولع مع اني لو أبجت – رشيت - موظف غير محترم هتخلص الأمور ، لكن علي جثتي ، يا أنا يا النظام الفاسد .