أنا حرامي ،، الخاتمة ،،

ثالث مرة برضوا كنت في تانية إبتدائي تقريبا برضوا ، إتصابحت علي عيل أكبر من بسنة بس صايع وقولت أهوا ينوبه في ثواب ويعلمني الصياعة ، وبعد فترة من أني أرشيه بلب إتكرم وإداني أول درس – سرقة بطيخ – مع إني مش محروم ولا نيلة بس رحت أسرق و هبقي صايع أخيراً، سرقنا بطختين ، بطيخة صغيرة و بطيخة الست صاحبت الفرشة كانت رشآها في الميزان بدل ما تحط – الكافة – وبعد تنفذنا للعملية قعدنا نجري ولا كأن كلاب الدنيا بتجري وارنا مع إن مفيش حد شافنا ، واللي زاد الموضوع قرف إن إزاي هنقسم الغنيمة وإحنا معناش سكينة ، فإقترح الخبرة اللي معايا إننا نفقشها ، ورفعها فوق وهوووب في الأسفلت قامت متفشفتشة وللأسف طلعت شبه قرعا والتانية طلعت معفنة ، بس كلناهم هوااا إحنا نتعب في سرقتهم ومنكلهمش ما هوا دي اللي ناقص .

رابع مرة وآخرهم علي كبر كانت العيد اللي فات ، أنا مش مدخن والحمد لله بس الحاج أبويا بيدخن ربنا يهدينا ويهديه، وبما إنه بيشتري تموينه من السجاير مرة واحدة كل أسبوع ، وبيعينها فوق الدولاب ، وزني شيطان هوايا إن أخد علبة عشان أوصل لأبويا رسالة ما بدون مواجهة لأني من النوع اللي مش بعرف أواجهه ، وبعد ما شربت 4 سجاير مليت قلت أرميها قلت خسارة دي ب عشرة جنيه ونص بحالهم ، قلت خلاص أنا أخلاصها وأجيب للأبويا واحدة تانية مكانها ، رد ضميري بس أنت مش عايز تشرب القرف ده ، قلت ممنهاش لازم اقوله وأمري لله ، قمت قايل له ، قالي لو عايز تشرب إشرب إنت دلوقتي مش صغير ومسئول عن أفعالك ، قلت : أصل أنا بعد ما خدتها قلت أجيلك وحدها بدلها عشان متعرفش ، لقيت عمك الحاج برأ لي وقالي : حرامي وكمان مدلس ، بصيت له باستغراب !!! قالي : آآآه حرامي عشان مديت إيدك علي حاجة مش بتاعتك ، ومدلس عشان بتحاول تخبي علي جريمتك بجريمة تانية ، هنا عرفت معني كلمتين كنت نسيت مدلولاتهم ، تشكر يا عم الحاج يا بويا ، برضوا الواحد بيحتاج تذكره من فترة للتانية بس خلاص .

معلش هسأل سؤال بمناسبة الظابط اللي رفض رشوة 15 مليون $ عشان يهرب آثار ، أي حوالي 86 مليون جنيه مصر ، إنتوااا لو كنتم مكانه وإتعرض عليك 86 مليون جنيه كنت هتعمل إيه ، وعايز إجابات واقعيه مش مثاليه الله يخليكوا ، صدقوني أنا لما فكرت في السؤال إترددت وخوفت علي نفسي مني وطبعا علي مصر .