العصفورة

كنت أكره العصافير وأنا عيل ، السبب كنت كل ما أعمل مصيبة، ألاقي أمي تثبتني وتقولي إنت يابن الكلاب ايه اللي خلاك تعمل كده ( وقد اكتشفت من قصص التراث أنها شتية ستي أم أمي ثم ورثتها أمي ثم أورثتها إلي أختي وقد سمع أبي السبة في يوم ما وتأكدوا انه لم يمر اليوم علي خير ) ؟ وبعد الإنكار الطفولي . أعترف بعملتي أياً كانت وكانت اجابة أمي عليّ بعد الخرطوم اللحمربتاع تسليك البلاعة والشبشب بتاع الحمام والنهنهة سؤال مين اللي فتنلك عليا؟ وكانت الإجابة واحدة دائما – العصفورة - , وعرفتني ان كل أم معاها عصفورة صغيرة بتقولها ابنها بيعمل ايه دلوقت وفين ، طبعا أن كنت مرعوب من مجرد التفكير في الأمر ، وكنت كل ما اشوف عصفورة في الحته اللي بعمل مصيبة فيها كنت أبقي خايف انها تكون هي دي بتاعة أمي اللي بتفتن عليا ليها مع إن لكل عيل صغير مصايبه وللأسف عصفورته الفتانة .

***

طب مفيش طريقة لمعرفة أم العصفورة دي ويبدو إن عصفورتي بتسترزق علي قفايا ، ورغم وجود ذلك الجهاز التجسسي الرقابي إلا انني كنت أغلط دايما مرة تانية وأعمل العملة من دول وهوووووب ألاقي أمي قفشاني مرة تانية والخرطوم اللحمر يشتغل أو الشبشب والنهنهة مع العلم أنني أكثر واحد ادلعت في إخواتي عشان آخر العنقود وآخر العنقود سكر معقود ، اخواتي بقا شالوا 90 % من هزار أمي ربنا يكون في عونهم .. خرجت مع عيال الشارع في رحلات صيد للعصافير يمكن العصفورة بتاعتي تموت علي أيدهم ، بس برضه رغم اقتناصنا عدد لا بأس به من العصافير ، ظلت أمي تعرف مصايبي ، لذا سلمت بالأمر الواقع والعصفورة ، ولم اكتشف حقيقة العصفورة الفتانة إلا عندما أصبحت صبي وإنتقلت المسؤلية من أمي لأبي .. في التوجيه .