Copy>Paste>Delete

من الخصائص التي يتمتع بها شعبنا العربي ( والحمد لله الذي لا يحمد علي مكروه سواه ) Copy > Paste> Delete أي انسخ < الصق < احذف فحياتنا تسير علي هذا النهج اللي ملوش آخر عندك مثلا الطلاب في المدارس عندنا يعمل كوبي للمنهج يخش الإمتحان يعمل باست يخرج منه يعمل دليت وبذلك قد اتم عمله علي أكمل وجه فاذا فقد احد هذه العناصر التلاتة يصبح بذلك دخيل تخيل ابن حضرتك أو ابن اختك أو اخوك دخل الإمتحان عمل كوبي وباست ومعملش دليت خرج كده بعد شهرين قالك يا بابي انا لسه فاكر المنهج اللي درسته في ( اللسكول ) اللي هي المدرسه يعني لذا ننصحك عزيزي الأب باتباع التالي بحذافيره :

1- يعزل الإبن عن بقية الإخوة انتا عارف العدوي بقي ممكن تعمل ايه .

2- تبلغ وزارة التربية والتعليم إن فيه واحد عمل عملية كوبي وباست ومعملش العملية المهمة جدا عندنا اللي هيا دليت ( علي فكرة وزارة التربية والتعليم هتقوم بالواجب وزيادة حبتين ) .

3- يعرض الإبن علي اقرب طبيب نفساني لأنه يعني ممكن يكون معقد .

4- اذا فشل كل اللي فات ننصحك عزيزي الأب تودي ابنك لمدرسه حكومي لو كان في مدرسه خاصة وطب لو كان في حكومي اصلا تويده دروس خصوصية المدرسين فيها بيعلموا العيال ازي يحلوا هما لسه هيفكروا في السؤال طب لو ابنك بيروح درس خصوصي ما عليك إلا الخطوة الإخيرة وهي دروس التقوية علي فكرة ( دروس التقوية هي الحل العملي للحالات المستعصية ده اذا كان ابنك خلاص مفيش امل والطريقة دي متجربة واثبتت نجاح جامدا جدا ) .

ده كان المثال السهل في حياتنا المصرعربية لكن فكر كده في الوضع هتلاقي حياتنا ( كوبي – باست – دليت ) حتي المواضيع اللي علي النت تلقائيك ياعيني كاتب الموضوع وطالع عينك فيه وتلاقي واحد كل اللي عمله ( كوبي – باست ) لذا ننصح أي مشرف علي سيت ( يعني موقع ) انه يعمله ( دليت ) عشان تبقي كده الطبخة استوت .

وفي الأخر اقول حسبي الله ونعم والوكيل – ابوس ايدكم - اللي عمل كوبي للموضوع ده ياخدها في مكان سكرت ( يعني خفي ) علي الهارد ويعمل باست وبعد كده يعمل دليت للموضوع الأصلي . ( يا حلاوة )