مش عارف1

مش عارف اضحك ولا ابكي من دعاة اليومين دول تلاقي الدنيا في وادي وعمك الشيخ في وادي تاني خالص عندك مثلا الفيلم الـهولندي المـسـئ للاسلام حيث ظهر القرآن ممزق والرسوم المسيئة لشخص الرسول محمد ( صلي الله عليه وسلم ) تخيل حضرتك خطبة الشيخ كانت عن ايه ؟ .. كانت عن افضلية الرسول عن بقية الرسل .. طب يعم الشيخ مش تقولنا نعمل ايه في المشكلة الأكبر ، يعني ازاي نـبلغ الناس دول إن الاسلام مش زي ما هم فاكرين ، مش عارف هل الشيوخ بيتقلهم يقول لنا ايه ولا المصيبه الكبيرة ان عقول الشيوخ هي اللي كده .

طبعا مش كل الشيوخ كده بس الأكتريه كده .. عندكم مثلا الأزمة الطاحنة في رغيف العيش فين الدعاة اللي وجهوا الناس وطالبوا المسؤلين بحل هذه الأزمة الطاحنه – هم الناس دول مفكرين الناس هتعرف تعبد ربنا وبطونهم خاوية – فين الأئمة اللي بتحل مشاكل الناس – فين الأئمة اللي بتحاول تدخل الشباب الجوامع بدل ما يخرجوهم منها .. فين الناس اللي زي الإمام الشافعي – فين الدعاة اللي تطالب أولي الأمر بالعدل حتي لو كلفهم ده الغالي والنفيس – آه لو كان سيدنا عمر بن الخطاب موجود دلوقت شوف كان عيعمل ايه في المسؤلين والشيوخ .

من زمان نفسي اسمع خطبة يتكلم فيها الإمام عن علم النفس في الاسلام ومعالجة النفس البشرية بالقرآن مثلا ولا يتكلم شوية عن الكمـيـا ولا الفيزيا ولا حتي الأحياء .

يا دعاه متسألوشي الشباب بينحرف ليه ؟ اسالوا انتوا عملتوا ايه عشان الشباب مينحرفش ؟ انتوا مفكرين كده ان ده هيعدي بالساهل لا يعم الحاج تبقوا بتحلموا .

انا مش بقولكم سيبكم من الدين – لكن- اربطوا الدين بالدنيا ده هي ميزة الاسلام انه دين وسط علموا الناس يعملوا ايه في دنياهم عن طريق دينهم – علموا الاباء ازاي يعملوا اولادهم – فيها ايه تتكلموا في الدنيا ، الخلاصه خير الكلام ما قل ودل والفعل خير من الكلام – وزي ماقال سـيــدنـا عثمان في خطبة من ابلغ خطب التاريخ" اتريدون اماما فعالا اما قولا .. اقم الصلاة " تخيلوا اني دي خطبة الجمعة ،انا مش شايف الدنيا سوده – كل اللي انا عايزة ان الحال يتظبط ويبقي ميه ميه .

ارجوكم اتكلموا في هموم الناس – حلوا مشاكل الناس – بصوا لقدام – خلي الناس تفتخر باسلامها وبعروبتها – متبقوش انتوا في وادي والناس في وادي – متبقوش انتوا في ضفه والناس في الضفة التانية – متخيروش الناس بين الدين والدنيا / لكن خلوهم حاجة واحدة .