سيبه أحسنلك

بما إني موظف حكومي ، فقد أصبح النفاق الاجتماعي أحد المواهب التي أتملكها أيوااااااا أومال ، بص يا سيدي أنا مليش في مجاملة حد ونفسي شايله منه ، ربما ابتسم آه لكن أجامله دا علي جثة أي حد مش بيحبني ، وبما إنكم عارفين إني موهوب بالفطرة لما كنت تلميذ ، فزي ما تقولوا كان عندي موهبة أشبه بـ - ميسي – أكيد أومال ، بس لحد دلوقتي نفسي أكتشف بقي ليه مكنش حد بيرضي ياخدني معاه في فرقته ، خلاص خلاص هقول الصراحة مش هفشر ، الصراحة مكنتش بعرف ألعب كورة ، كنت في الضياع ، ميح ، أبيض يا ورد ، حاجة كدا تقولوا عقدة كروية ، المشكلة إن كل الفرق مكنتش بتختارني لأن اللي بيختارني معرفش ليه – الله أعلم – الله أعلم – بيعتقد وبيظن ويخمن أنني ألعب مع خصمه .

وقد كان مما سبب حال نفسية سيئة أيضا بجانب ( لعب الكرة ) أننا كنا نلعب ألعاب تعتمد فيها علي الجري ومحاولة مسك الخصوم ، ومن يمسك أولاً كان مثالاً للبلادة في الجري ومصدراً لسخرية باقي اللاعبين، كان أي حد يجي يجري يلعب يدور علي – أتخن واحد – ويجري وراه لحد ما يمسكه ، وبعد ما يمسكه ، يبصوا عليا ويصرخوا ( إمسك بسام – إمسك بسام ، مبيعرفشي يجري ) ، مع إني كنت رفيع أياميها والله - عيال معندهاش دم - .

وهذا ما أهلني وجعل فوق كاهلي حمل جسيم ، وهو أن أكون القائد الملهم لفريق " المنبوذين " ، وكان ما يميز هذا الفريق ( أننا نزل الملعب عشان نخسر ونخرج تاني نستني دورنا من جديد عشان نخسر من جديد ونخرج تاني ، أوماااال مش الغالب مستمر ) وكانت تلك هي المهمة الوحيدة المخول والمسموح لنا بتنفيذها ( الخسارة ) ، نادرا ما كنا نفوز وكان ذلك دلاله " بحمورية اللي بيلعبونا " لأننا كنا الأجدر في المركز الأسوء .

ولكي أداري علي فضيحة ( الجري ) فضلت أن أكون في مركز حارس المرمي ، وقد نجحت في صد كرات جمة ، وأرجعها أحد الأصدقاء إلي ( هرولتي علي الكرة ، أشبه بطور يجري علي الكرة ، مما يخيف المقترب للمرمي ويربكة لأن حياته علي المحك ، فتضيع الفرص أمام الطور – أقصد المرمي ) .

المهم تمر الأيام والسنون ، ويبدأ بعض المدرسين في التهرب من أن ألعب معهم بعد أن أصبحت مدرساً، لأن مهارتي علي ما يبدو صدأه قليلاً ، فطلبت من مدرس ماهر في الكرة أن يدربني علي حراسة المرمي ، بعد قليل نزل آخر وبدأ الاثنان بركل الكرة بعضها معتدل والآخر قذائف صاروخية محرمة علي اللي زي حلاتي ، جئت أن أحمدُ الله وأشكره أن الناظر لا يلعب منا ، حتي وجدته أمامي ببدلته الزيتي ذات الطراز القديم ، وعلي ما يبدو أنه سبقني بحمد الله وشكره .

فضلت واقف متحير أكلم نفسي ، " الراجل ده أصد له ولا أسيبه يدخل إجوان ، ما أهو أنا لو سبته يدخل مش هتعلم ، ولو صديت ممكن يستقصدني ويغلس عليا في الحضور والإنصراف ، أخذ ضمير وهواي في الخناق بين تركه يسجل ، والإستماتة علي الصد ، فقررت الإستماتة ، وبعد بضع كرات مصدودة ، وجدت أن حاجب " مولانا " تجعد ، فقرر ضميري التنازل ، وأحرز هدفا ، فإبتسم " الشيخ " للهدف ، وابتسم المدرسون له ، وابتسمت وتنفست الصعداء .