3 × 1

3 × 1 وبدون رغوة ، من الله علي ب 3 واجبات ولابد من حلهم مكرمة لأصحابهم .

أول وثالث واجب من مدونة " الفكر الحر " لـ خالد أبجيك

ثاني واجب من مدونة " اللي فرط يكرط !! " لـ لاتي LATI

نحل من القديم للجديد ونبتدي بالصلاة علي النبي الزين ، عربي أصيل ما في منه إثنين ، جلنا بأمر الإله ، فمن إتبع خطاه فلح ومن زاغ عنها تاه والسؤال الأول إتحل وجاوبناه ، وكان عن اللي أرسل الواجب إياه .

الواجب الأول من الأخ " خالد أبجيك "

----------------------------------------

- ما هي المواقع المفضلة لديك وتزورها بإستمرار ؟

- موقع جوجل للبحث " كتر خيره لولا وجوده كان الواحد يا قلب أمه اتبهدل "

- الفيس " ومنصحش بيه " لأنه في إحدي الدراسات بمصر أثبت أن الفيس ( أحد أسباب إنخفاض نتيجة الطلاب في مصر ) وإنت حر بقي – اللهم بلغت - .

- مواقع كتب من منتديات ومواقع مختصة بالكتب " طبعا أنا مش بنزلها لنفسي دا أنا بنزلها للمعارف من محبي الإطلاع ، أهو أكسب ثواب بسرقة المعرفة وإعطائها للغير " .

- مواقع إخبارية زي " بي بي سي ، اليوم السابع ، دوتشيه فيله "

- المدونات " اللي عملها الغلابة اللي زي أهوا أقرا حكمة أو أسمع نكته أو أشوف بلاوي الناس عشان تهون عليا بلوتي أو أعرف كيف أتصرف مع الدهر في زمن الضرب علي البطن للي ملوش ضهر "

الأول خلص ونخش علي التاني :

الواجب التاني من الأخت " لاتي "

---------------------------------------

- هل أنت فضولي ؟

بسم الله الرحمن الرحيم ، أنا من النوع اللي هبقي هموت وعايز أعرف إيه اللي حصل . بس بحاول أجمح مكابح نفسي الأمارة بالسوء ، الموضوع مش سهل ، وغالب بيكون تعادل بين الضمير والنفس الأمارة .

- ما هي الأسئلة التي تستفزك ؟

حد يقولي الساعة كام ، لأني لسه هضطر أطلع المحمول بقي وأدقق بنظري وأقوله كمان ، كان زمان الواحد عملوا يجي مليون جنيه ، ولما هوا أصلا عايز يعرف الوقت ما يشتري ساعة ومتقلش غالية في ساعات ب 2 جنية موجودة ، بس مع كدا بحب أسأل الناس الساعة كام، هو أنا لسه هلطع الموبيل أشوف ما أخلي واحد تاني هو اللي يشوفها لي .

برضوا فيه سؤال بينرفزني ، لما أبويا يقولي " أكلت المعيز " ببقي متنرفز لأني غالبا بكون قاعد علي الكمبيوتر ، ومش بحب حد يقومني من عليه .

سؤال كمان بيعكنن علي مزاجي لما حد يسأل علي شغلتي وأقوله " مدرس حاسب " يسأل ويقول " وده بينضاف للمجموع " عشان يحدد " مادة الحاسب ليها لازمة ولا ملهاش " وبالتالي يبص ليك بشماتة " لما يعرف إن مادتك مش بتنضاف للمجموع " ويبتسم إبتسامة خبيثة لإشعارك إنك إنت كمان ملكش لازمة "

الثاني خلص ونخش علي التالت ودا الأخير والله أستحملوني ، ودا آخرة اللي يأخر واجب ، ومن هنا أنصح وأطالب وأرجو وأبوس إيد الطلبة والطالبات وأقولهم " لا تؤجل عمل اليوم للغد ، لأنك لو أجلته هيطلع عينك في اليوم اللي بعده ، و اللي علي راسه بطحة بقي يحسس عليها " .

الواجب التالت من الأخ " خالد أبجيك" برضوا

-----------------------------------------------------

1- لخص حياتك الدراسية في جملة :

خلصت دراسة وهيصه هيصه ، هنا العريس هيصه ، بس عايز أقول حاجة " من جد وجد " وعشان كدا أنا ملقتش أي حاجة بعد إنتهاء الدراسة .

2- لخص حياتك اليومية في جملة :

أصحو – أروح الشغل – أنام – لكي أصحو مرة تانية فأرحو الشغل تاني فأنام " دنياااااااا ، وما دايم غير وجه الله " .

3- لخص حياتك العاطفية في جملة :

كل ما واحدة تعجبني و أحطها في خانة زوجة المستقبل تتجوز لدرجة إني معنتش بفكر في حد خوفا إنه يتجوز ، دا أنا نبني ثواب في نص بنات البلد .

4- لخص مجمل ما عشت في جملة :

أحاول أن أجعل من حياة الآخرين أفضل ، وأنا جوايا أوضة مكركبة .

5- أرسل الواجب لأربعة من أصدقائك المدونين :

لا يعم لحد كدا إحنا إخوات ، وبحل ، أما السؤال الأخير هسيبه فاضي ومش مهم درجته تروح عليا ، ومش هقول اللي عايز يحله يحله ، لأن مفيش حد هيحله إلا لما ابعته بنفسي .. يلا مع السلامو عليكوا .