أحمق

احب أترسم واعمل فيها حكيم زماني قبل ما أبدا في الإجابة ، فيه مثل ياباني عجبني " أحمق كل من يصدق كل ما يقرأ " طبعا المثل دا مش بينطبق علي حجات معينة اكيد . لكن زي ما قلتلكم أن بترسم " الريس بيترسم واحنا بنشجعه "

اللي بعت الدعوه ؟

الدعوة جات لي من مدونة خواطر شابة ربنا يجبر خاطرها ويسعدها ويكرمها ، ويرزقني ببنت الحلال ويخليني ريس قد الدنيا يااااااااااااااااااااااااااااااااااااااااارب ، وبعتذر لها علي التاخير لمدة شهر وكام يوم .

ما هي كتب الطفولة التي بقيت عالقة في ذاكرتك؟

كتاب الرياضيات لأنه اللي كان بيدها لينا مدرس خنيق يا أم رزلته مكنش في قلبه رحمه ويا ويييله اللي ينسي الكتاب ، تبقي أمه داعيه عليه ، لأنه هياخد علقه مخدهاش حمار في مطلع علي رأي امي لما كانت تتوعدني وأنا صغير .

مَنْ أهم الكتاب الذين قرأتَ لهم ؟

المنفلوطي ، السعدني ، خالد محمد خالد ، العقاد رغم إني بحس بحمورتي وانا بقرا للأخير ، وروجيه جارودي ، مراد هوفمان ، بيرم ، جاهين ، الفاجومي .

من هم الكتاب الذين قررت ألا تقرأ لهم مجددا؟

اسلوب صلاح عبدالصبور مطقتوش من أول كام ورقة مش عارف هوا اللي خنيق ولا أنا اللي أخنق منه .

في صحراء قاحلة ، أي الكتب تحمل معك؟

أكيد القرآن ماشي ، وأي كتاب العربية الكرو اللي هتاخدني تقدر تشيله فيها ، مش انا بقي رايح صحرا يبقي لازم هركب عربية كاروو اللي هتاخدني أو هنخخ جمل وأركبه وشيييييييه ، لإيماني بإن أي كتاب يلخص حياة إنسان غيري وأنا أريد ان أحيا حيوات كثيرة .

ما هو الكاتب الذي لم تقرأ له أبدا ، وتتمنى قراءة كتبه ؟

هما أكتر من واحد بس بما إن السؤال لواحد بس وعشان اخذ درجة السؤال كله ، محمد حسين هيكل اللي عامل كتاب حياة محمد ، ودا غير الكاتب السياسي محمد حسنين هيكل ، قلت أنوه بس عشان اللخبطة .

ما هي قائمة كتبك المفضلة ؟

كتاب كيف تبيع أي شيء لأي إنسان لجو جيررد ، النظرات للمنفلوطي ، والأعمال النثرية لبيرم ، دافنشي كود لدان براون .

ما هي الكتب التي تقرؤها الآن ؟

أنا دلوقتي في فترة لخبطة في حياتي ، عدم تنظيم ، فتحت كذا كتاب بدون أن اكمل كام صفحة في كل كتاب لكن ناوي أقرا باذن الله ( الأعمال الكاملة لمحمد عبده ) ، رواية قرية ظالمة ورواية ثورة 2053 البداية و ثورة 2053 البداية مرة أخري ، وكتب في التنمية الإدارية .

أرسل الدعوة لأربعة مدونين من أجل مشاركتنا بذكرياتهم مع القراءة ؟

أنا هغير السؤال وهخلي الواجب اختياري وبذلك هخلي العدد " اشلبدي " يعني جامد بالهبل ( السبب اني مكنتش متابع فمعرفش مني اللي حله من اللي محلوش ) منهم حله ( عشان مفيش حد مل مُعارضة يستغل الموقف ويطلب وقف المعونة عن المدونة ) وأحب انصحهم واقولهم ( ما دايم غير وجه الله ودام كاس لازم كل مدون ويشرب منه ) لذا سأرسل لهم الواجب فمن شاء كر ومن شاء فر .