زغرطي يامه

الأستاذ محمد .. شغال موجه ثانوي .. و بالكوسه أو علي الأقل أنا اللي بظن ذلك .. اشتغل في الكلية اللي كنت بدرس فيها واتعين معيد ولا تسأل عن الكيفية فتلك البلاد كل ما تستطيع أن تصنعه فيها أن تتعجب علي ألا يراك مخبر لأنك لو اتمسكت وانت بتتعجب ( هيعملوا لك عيد ميلاد وهيشلوك من علي الأرض شيل شـــيـــل - مع مد الياء- لإدراك الكيفية ) ، هو رجل طويل ، ربع أصلع ، ذو شعر طويل نسبيا ناعم مقلوب للخلف وتقريبا عدا عمره الخمسين عاما ونيف ، الأستاذ حماده كان أغلبية الصبيان مش بتطيقه ، كان لما يسأل سؤال وكله يرفع ايده يتعمد أن يختار البنات عشان يديهم درجات السكشن ، ومش هقولك بقي ، مثلاً عيل غلس جواب بدون إذنه تلاقيه ميردش عليه ولا أكنه سمع الإجابة ، ويختار وظوظه من الوظاويظ – ولفظ وظوظة أخذتها من أبويا – لما يحب يدلع ولاد عماتي أو ولاد خالتي أو حتي عماتي أو خالتي وفي بعض الأحيان يحرفها إلي – وزه - وهما لفظان يطلقا علي البنوتات فقط ، إما لو بنت جاوبت برضوا من غير اذن وقالت حرف واحد فقط لا غير ، تلاقي الأستاذ يجري علي المكان الصادر منه صوت الحرف ، ويقول أيوه أيوه شاطره كملي .

مرت الأيام وجه وقت الإمتحان الشفوي ، طلعت له عشان أمتحن ، اتسألت فيما يقرب من 4 أو 5 أسئله جاوبتهم كلهم صح وغلطت في كلمه واحده ، عما أتذكر إنطلب مني مؤنث كلمة ( برنس ) فقلت ( برنسيسا ) فصححها لي المبجل وقال ( برنسز ) ، خدت 13 من 20 مع اني كنت مواظب علي الحضور في السكشن و فيه طلبه كانت بتتسأل بال 7 أسئله ، أعلي واحد في الدفعة جاب 14 اللهم إلا 3 طلبه ذكور ، وأسباب الدرجات كالآتي ، إتنين منهم شفوه في السوق ، راحوا يسلموا عليه واقترحوا انهم يشيلوا الطلبات اللي شايلها لحد البيت أصل ما ميصحش يشلها وهما معاه فوافق مولانا بسعادة الغرقان اللي لقي طوق نجاة وهوا هربان علي إيطاليا ، وشعروا بالسعادة لأنهم أدركوا أنهم هيتخدم عليهم في الدرجات وهيتظبطوا ، إما ثالثهم بقي فكان شعره طويل وناعم ومسبسب بالصلاة علي النبي ، سأله الأستاذ سؤال واحد فقط لا غير مين بطلة القصة – اللي احنا بندرس فيها طووووووول الترم – جاوب ابو شعر مسبسب إجابة صحيحة ، إغتبط المدرس للإجابة وادلف قائلا " تصدق شعرك حلو " وحصل الأخ بعد الإطلاع علي البيانات السرية لورق - المعيد اللي هوا موجه ثانوي اللي انا مش عارف اشتغل في الكلية ازاي - بواسطة أحد الطلبة الشريرين علي 19 من 20 بسبب شعره الحلو المسبسب ..... زغرطي يامه والعسل النحل – العسل النحل ، وهيصه هيصه ، وهيصه هيصه .. بس خلاص .