التاج السلطاني وسامحوني

نبدأ ببسم الله الرحمن الرحيم ، بالصلاه علي النبي كده ..

أفتكر نصايح أمي الأول اااه : لما تيجي تجاوب علي امتحان سمي واقرأ آية الكرسي والمعوذتين ، وجاوب من أول السطر وسطر الورقة والسؤال اللي متعرفوش سبله مكان فاضي مش يمكن تعرفه، ومتشخبطش في الورقة كتير عشان المصحح مش بيحب الورقة اللي شكلها وحش ، واكتب بخط حلو برضوا عشان المصحح ، طبعا انا زدت عليها اني اضحك في وش المراقب عشان يضحك واعرف احل ، أو يسيب اللجنة .

السؤال الأول (نقطتين وشرطه ) :-

-------------------------------------

إسم اللي اداك الواجب ؟؟

أوبااااااااا ، جيت للسؤال المحرج ، الواجب وصل من مدونتين ، أول مدونة كانت ( من مذكرات مريض نفسي ) وعملت مصنج عشان مش بحب اعمل الواجب فأرجو إنك تسامحني يا سحس .

ثاني مدونة كانت ( البنفسج الحزين ) وكدا اصبح الواجب اجباري لأن البنفسج دبستني بتعليق في المدونة ، فالطرش والعمي اللي عندي راحوا اضطراري .

السؤال الثاني ( نقطتين وشرطة ) :-

---------------------------------------

ما هي القوانين لحل الواجب ؟؟

أنا راجل ديموكتاتوري ( ديموأراطي + ديكتاتور ) الواجب يتحل يا حبيبي بس مفيش أباحة .

السؤال الثالث ( مش هحط نقطتين وشرطة بالعند فيكو ) :-

-------------------------------------------------------------

اتكلم عن 6 أسرار لن يكتشفها أحد أول مرة يقابلني ؟

السر الأول : إن أنا واطي وندل ، وساعة الشغل بخلع و بَكُتْ يعني بَفَلَقْ ، لأني مش بحب الأعمال العضلية رغم اني راجل المفروض انا اكل الحديد ولا بلاش عشان غلي خليها اكل الظلط ، والغريب اني بخدم الغريب عشان يقول جدع ، والقريب لاء مش بقولكوا واطي ( بس بجد مش عارف السبب يمكن عشان بتحرج من الغريب أما القريب فبيكون عند الشجاعة الأدبية للرفض ) مش عارف .

السر التاني : هيا حاجة من اتنين ، يا إما إني أنا غبي وبدعي الذكاء ، أو ذكي بدعي الغباء ، ومعلش اعتبروها التانية لأن الأشخاص بتكون علي حقيقتها لما تشوف اللي قدامها احمق ، زي الشخص لما يلاقي واحد اعمي ممكن يقعد زي ما ولدته أمه عشان مستعمي اللي قدامه ، أنا بقي بحب البس نضارة وامسك عكاز لأنها اسرع طريقة لمعرفة الناس .

السر الثالث : كسول بغباء لدرجة إني احيانا ابقي عايز اخش الحمام وعايز اكمل اللي بعمله علي الكمبيوتر ، فبأجل الحمام وأفضل مزنوق ، أنا لسه بقي هحرك الكرسي وهقوم وامشي لغاية الحمام عشان اعمل ( بي بي )، اقعد يا عم أحسن .

السر الرابع : بدعي إني بفهم وأقدر اميز الناس من ملامح وشها ، واني بعرف في لغة الجسد ، أصل الشخصية الإنسانية بتمثل لي مصدراً لجميع الأحداث ، ومتابعة تصرفتها دا شيء جامد جدا بالنسبة ليا .

السر الخامس : بحب اضحك الناس ، حتي لو وصلت إني اتريق علي نفسي ، لأن ده بيشعرني بسعادة غريبة ، لان رسم ابتسامه علي ثغر انسان ليس بالشيء الهين ، فأبدو غالبا بأني احمق ، مع اني متحامق أو هكذا ادعي .

السر السادس : إني فضولي بطبعتي البشرية ، وبحاول اقتل الشعور ده ، فرغم اني ببقي هموت واعرف الأشخاص اللي قدامي بيخبوا ايه ، إلا انني اجهار بإني مش عايز اعرف ، وبحاول اكبت الشعور ده بأي طريقة كانت .

السؤال السادس :-

-------------------

إدي الواجب ل 6 مدونين واذكر أسمائهم مع روابطهم في المدونة ؟

بعد التفكير العميق بين اختيار أول 6 اشخاص قروا ليا ، أو أول 6 تعليقات علقوا عندي ،أو اقرب 6 إلي قلبي ، أو اكثر 6 مدونين بيعلقوا هنا ، أو 6 مدونين معرفهمش وادي لهم الفرصة إننا نتعارف ، فضلت ألا اختار احد أو بمعني اصح اختار كل المدونين ، لأني مش بحب الواجب ، ورافض إن فكرة التاج لازم حد يدهيه ليا عشان اكتب عن نفسي أو لحد غيري ، لأن المدون بيدون لنشر فكره فالبتأكيد له المساحة الأكبر في المدونة .. سامحوني مش هقدر ادي الواجب لحد لأني هحس إني ظالم بجد ومش هرتاح نفسياً .. معلش طولت عليكم وخنقتكم فسامحوني .