يبدو نحن أهل العرب أننا عندنا قناعة تامة بالحكمة العربية الشهيرة " أن الضربة التي لا تقتلك ، تزيدك قوة " فتركنا قفانا للضرب لحد ما طلع في قفانا عضلات ، وواحد حلفي لي إن فيه دراسة علمية إشتركت فيها معظم الدول العظمي بتقول ( إن من المحيط إلي الخليج هو المكان الأوحد علي ظهر الكرة الأرضية اللي بتطلع فيه عضلات في الأفا ) ، فالدول الكبيرة حبت تجرب الدراسة علي الطبيعة عشان ما يتخموش ( ماهو برضه النظري يفرق عن العملي ) . وإيمانا منا بالمثل الشعبي " ضرب الحبيب زى أكل الزبيب " ( تقريبا اللي ألف المثل ده كان طفس ) تركنا أمم الأرض تبهدل في اللي جبونا ، فتري كل من أراد نشر فكرة ما ، يجى يجربها في اهلنا ، و احنا بما إننا اهل الكرم نرحب بيه أيما ترحيب ، وكل الشعب يعملك فيها ( حاتم الطائي ) .
أقولكم الحق ، أنا شايف إن أمريكا مش غلطانه ( أنا عارف إن الفكرة دي هيختلف عليها كتير معايا ) إنما إسلوب أمريكا ( الواطي ) هو اللي غلط ، البلد دي بدور علي مصلحتها ( زي معظم شعوب العالم ) علشان تعيش علي قد ما تقدر ، فلقت بلاد تانيه فيها خير مش عارفة تستغله ، فعملت فيها دور الأم الحنون ، الراعية لمصالح الشعوب ، الخدومة بدون إنتظار !!
استحملوني في التعبير اللي جاي ( احنا بالضبط عملين زي جبنة لافشكريه ) لما نترجم المعني تبقي جبنة البقرة الضحوك ، آه والله ، جسم البقرة هي الأوطان اللي مليانه خير ، وراس البقرة هي الأنظمة ( بتضحك دايما بلا مبالة " ضحكة غبية " ) بس تلاحظوا إن الصورة مطلعش فيها صاحب البقرة ( فالدول الإستعمارية ) خدتها وضع يد ، كل جماعة تقول دي بقرتي ، وفي النهاية إتفقوا إن كل واحد ياخد حته ( وطلعوا نفسهم في الصورة علي إنهم صحاب البقرة ) .
في يوم من الأيام اللبن هيخلص من البقرة ، وفي النهاية هيرموها عضم بعد ما كلوها لحم ، بس ده مش هيحصل لو صحاب البقرة الحقيقين رجعوا من غربتهم ، وسابوهم من سلبيتهم ، اللي ملهاش أي مبرر ، ولا حتى مبرر اخلاقي .. ولا عايزين البقرة تنادي عليهم وتقول "عاعاعاعاعا" ولما نجي نترجم كلام البقرة : " لما لقيت أهل ضيعوني ، صعب عليا إني أضيعهم " .. يا ناس يا هو حتي البقر اتكلم ( إمتي بقي هنكون زي البقرة ) عفوا .. قصدي إمتي هنتكلم ونطالب بحقوقنا .
ليست هناك تعليقات:
إرسال تعليق