خلاص خلاص هشرب اللبن

زمان وانا صغير كان ديما في حكاية قبل النوم ، وديما كان الحكايات بتتكرر بدل المره ميه ، و كنت بحب أسمعها للمرة الميلون بشغف المتلقي أول مره للحكاية ، ربما يكون للأم أجندة من ورا الحكاية لشرب لبن أو سماع كلام أو حتي الوقوف في صفها في وقت ما أو زرع وازع ديني أخلاقي أو ترويعه من الأغراب الذين يقابلهم لأول مره أياً كانت أجندة الأم فمش موضوعنا، ولما كنت بسترجع ذكريات –المعيلة- الطفولة يعني مع صديقي الصدوق أحمد طه حكا لي حكاية اتحكت له وبدوري لازم احكيها لكم ونبتدي الحكاية بالصلاة علي النبي – قولوا عليه الصلاة والسلام – كمان زيد النبي صلاة – عليه الصلاة والسلام كان يا مكان في وقت قريب مش من زمان ولد اسمه حسين مش بيسمع الكلام ماما قالت له اشرب اللبن يا حسين عشان تكبر وتبقي قوي – رد وقالها لأ مش شاربه ، ماما قالت له هنادي للعصاية ، عاند حسين وقال نادي لها ، قالت ماما للعصاية : يا عصاية يا عصاية ممكن تضربي حسين عشان مش راضي يشرب اللبن ، ردت العصاية وقالت : لأ مش هضربه ، قامت ماما راحت للنار وقالت لها : يانااار يانااار ممكن تحرقي العصاية عشان مش راضية تضرب حسين عشان مش راضي يشرب اللبن ردت النار وقالت : لأ مش هحرق العصاية راحت ماما للمية وقالت ليها : يا مية يا مية ممكن تطفي النار عشان مش راضية تحرق العصاية عشان مش راضية تضرب حسين عشان مش راضي يشرب اللبن . ردت المية وقالت : لأ مش هطفيها راحت ماما للبقرة وقالت لها : يا بقرة يا بقرة ممكن تشربي المية عشان مش راضية تطفي النار عشان مش راضية تحرق العصاية عشان مش راضية تضرب حسين عشان مش عايز يشرب اللبن ردت البقرة وقالت : لأ مش هشربها ، راحت ماما للجزار وقالته : يا جزار يا جزار ممكن تدبح البقرة عشان مش راضية تشرب المية عشان مش راضية تطفي النار عشان مش راضية تحرق العصاية عشان مش راضية تضرب حسين عشان مش راضي يشرب اللبن ، رد الجزار وقال : لأ مش هدبح البقرة ، فراحت ماما للحبل وقالت له يا حبل يا حبل ممكن تشنق الجزار عشان مش راضي يدبح البقرة عشان مش راضية تشرب المية عشان مش راضية تطفي النار عشان مش راضيه تحرق العصاية عشان مش راضية تضرب حسين عشان من راضي يشرب اللبن .

رد الحبل وقال : بس كده حاضر ، فرد الجزار بسرعة : خلاص خلاص هدبح البقرة ، وردت البقرة وقالت خلاص خلاص هشرب المية ، وردت المية وقالت خلاص خلاص هطفي النار وردت النار خلاص خلاص هحرق العصاية ، وردت العصاية وقالت خلاص خلاص هضرب حسين ورد حسين وقال خلاص خلاص هشرب اللبن ... وشرب حسين اللبن . خلصت الحدوته .. حلوة ولا ملتوته

عم محمد والمسمار

المسئول قاعد محتار

أصل الكرسي فيه مسمار

والمسمار عايز نجار

والنجار عايز لقمه

واللقمة محتاجه فلوس

النجار محتاج للأكل

و المسئول قاعد مفروس

يبكي علي واقع مغروس

أصل الكرسي فيه مسمار

قام المسئول الماكر

جمع الحاشية

وهات يا قرار

أول بند اخترعه البيه

صنع كراسي بدون مسامير

تاني بند اقترحه موظف

نشر بيان الوضع خطير

تالت بند أكيد معروف

يمضي الكل علي الإخطار

إن الهئية ضروري تفتح

فرع لكرسي بدون مسمار

عم محمد راجل شهم

رفض الإمضا عل الإقرار

من غير فهم

سبه المسئول المرشوق

وصف العم بانه حمار

عم محمد مات بالسكته

جه النجار

راح العم وراح الكرسي بالمسمار

الأستاذ ثروت

حضرت أول يوم في التربية العملي وأنا الفخر يملئ كل جوانب قلبي ، يا حلاوة يا ولاد وبقيت مدرس ياض يابسام وعين الحسود فيها عود وأمه داعيه عليه اللي يشوفك وما يصليش علي النبي ، أول حاجة تعملها لإثبات أنك مدرس تخش حمام المدرسين اللي كان محرم عليكم ايام الابتدائي والاعدادي واللي كنا بنخشه – في السكرته - ايام الثانوي، اخذت أتراقص وأنا داخل الحمام لأني بمجرد دخولي اياه أصبح أول شاهد لكوني مدرس , ومما زاد الأمر متعه وجدت أحد المدرسين بداخل الحمام الكبير النضيف جداً عكس حمام الطلبة اللي كان ريحته - نشادر - ، أومأت للمدرس برأسي في إشاره اللي احنا زُمل فرد علي بنفس الإشارة مما زاد فرحي فرحاً وقربت أزغرط .

علمنا أن المسئول عنا موجه اسمه ثروت ، تخيلته رجل طويل ممتليء بالمهابة يخط شعره الأسود خطوط بيضاء تزيده وقاراً في عيني و شخصيته مبهرة ، دخل علينا فوجدته قصير يبدو أنه صابغ شعره وقالبه ورا رغم سنه ، أخبرنا انه يعلم المدرسين علي ICDL وشعر بالفخر ، لم نكن نعلم أن هذه الكورس بسيط ، بمجرد التمجلس معاه كام مره أخبرنا بمعني غير صريح أنه يحب أن ننافقه أقصد نجامله ، في أحد المرات دخل علي زملائي بالتشيرت الكتب وطلب من كل واحد ابدأ رأيه الحلو في التي شيرت بتاعه ، وفي أحد المرات وقف يشرح ويعلمنا شممنا من نظرة عينه قول " بصولي يا بهايم ده الشرح ولا بلاش مش التخلف بتاعكو " ثم قال " العيل يخاف من العصاية والشخط شفوني وانا بشخط كده بس بلاش العصاية عشان لو حد جه هيودينا كلنا في داهية " ، في أحد المرات وهو يجرب طريقته الشخطيه رد عليه الطالب ببجاحة لم يستطع الموجه ان يفعل شيئا إلا أن وقف مبهوتاً مصعوقاً ولولا المدرسه الأولي كان زمان موجهنا العزيز اتشمبر ، وصدقوني مكناش هنحوش عنه – أندال بقي تعملوا ايه - .

طلب مننا في بداية السنة أن نعمل حفلة كبيرة في نهاية السنة ونجيب " طوووووورطه وكااااكولااااااا ويا ريت تكون كانز مل في علب صفيح دي " أدركنا ديته ، أخبرنا عيني عينك ان الدرجات توضع علي اليوم الأخير ( يوم الحفلة يعني فإن احسنتم فإحسان وإن أسأتم فنفخ ) ، أحد المتدربين منا كان يتحداه طول السنة وكان الموجه متوعده بالويلات ودرجات تبكيه بدل الدموع دم ، جه وقت وضع الدرجات في نهاية السنة قام زميلنا بالبحث عن جاتوووه الصلاة علي النبي شكله متكلف ، وجاب فيروز من السيبر اللي بيشتغل فيه اهوا بالمرة ينفع السيبر ، وطبعا خد الدرجات شبه النهائية لأنه طاب مجتهد وبرضه ياجماعه هوا اللي شال الليله ، في النهاية ودعناه بين داعي له وداعي عليه لأنه ساوي المجتهد بغيره بنظرة المجتهد ، وأنه أستاذ زي العسل بنظرة الغير ، ومشي الاستاذ ثروت ولحد دلوقت مشفتوش ولا عايز .

الموضوع كبير

قابلته في دورة الصيانة ، لأني لابد أن اشتغل في شيء إلي إن تتم الانتخابات و اخدها اكتساح ، واذا كنت تسأل لما الصيانة بالذات أقول لك لأنني منذ نعومة أظافري و سَبْسِبْة شعري أجيد الفك ولا اجيد اعادة ما فُك لدرجة أن أمي أطلقت عليا لقب " المخرب " طبعاً قبل أن يلقبني عيل رزل في الاعدادي ب " ضبعاية " ولكني لا آبه بالألقاب لكثرة ما أطلق عليَّ ، فرحت آخد دورة صيانة كمبيوتر لعل عقدتي تتفك .

لا اعرف لما وصل الحديث لتلك النقطة لكنه أخبرني أنه تم إعتقاله بسبب انتمائه لجماعة أنصار السنة المحمدية أو بالأحري السلفيين ، أنا والعياذ بالله من كلمة أنا عندي فكرة تقول أنه لابد أن أحترم كل الأفكار وأحتويها مادمت الفكرة ليست منافيه للاخلاق الاسلامية وبالتالي الانسانية لذا استمع للجميع ، ربما تخالطني مشاعر لكن احاول السيطرة عليها بكل ما أستطيع .

أخبرني أنه تم اعتقاله دون سبب ، وبعد 10 أيام تقريبا تم عمل أمر افراج كتابي ولكن لا يحدث الإفراج إلا علي الورق لأنه بعد 10 ايام أخر يتم عمل امر اعتقال كتابي بحجة " تم إكتشاف المذكور يعاود مزاولة نشاطه السياسي " ، فلا أوامر الإعتقال تنتهي ولا أوامر الإفراج كذلك ولا هو يخرج من المعتقل ، وصلت مدة الاعتقال الي سنة و 40 يوم بالتمام إلا أن تم الإفراج عنه بدون سبب كما تم اعتقاله بدون سبب ، أما امر الـ 10 أيام دول ليهم سبب بفرض حد جه من بتوع حقوق الإنسان ووجع دماغ اخوانا البعدا ، لذا لابد أن يكون عند الأمن مستند يفيد ان هناك حجة قانونية تفيد أنه يتم التحقيق معه لأنه طبعاً مش جاي يتفسح عندهم .

ظهرت عليَّ علامات الوجوم من المدة فأخبرته ، سنة و40 يوم بدون سبب !! وانت ما حولتش تجيب حقك بالقانون ، ضحك وقال أنا رفعت قضية بس لحد ما يتحكم فيها حلني وهيتحكم بإيه ، هاخد مبلغ مالي صغير ما يعملش حاجة ولا يسد الرمق .

قلت له طبعاً مفيش تعذيب ليكم هناك ، أقسم بالله أنه سمع من بعض المعتقلين الذين قضوا علي ما يربوا 20 و 30 سنة بدون سبب برضوا أن بعض الأجهزة الأمنية الأجنبية كانت تأخذ كورسات تعذيب علينا للاستفادة من عنصر الخبرة المصرية .

أقسم بالله أنه كان يتم تفريغ الطعام علي أرضيه قذرة ويكون الطعام كله علي بعضه ، فاقترح بعض الاخوة المعتقلين ان يتم تنضيف الأرضية ، حتي اذا ما تم رمي الطعام يرمي علي ارضية نضيفة ، فلما دخل مسئول الطعام ووجد المكان الذي كان يرمي الطعام فيه تم تنضيفه ، إختار بقعة أخري قذرة ليرمي فيها الطعام .

أقسم بالله أن أحد السجناء تم كسر باب زنزانته لأن الزمن مر عليه والاكل بيتحط له من تحت عقب الباب فمرت السنين ولما لم يفتح طول سنين ، صدأ الباب و اطاره وتداخل الصدأ فأغلق الباب تماماً وكأنه ملزوق بأمير ، فلما حاولوا فتحه ولم يستطعوا كسروووه .

أقسم بالله أن أحد السجناء كان يتأوه ويبدو علامات المرض ربما يودي إلي وفاه ، وإن لم ينقل للمستشفي احتمالية موته عاليه ، فنادوا علي سجانين المكان فكان ردهم " لما يموت إبقوا نادولنا غير كده لأ وبالمرة حطوه جنب الباب " .

أخبرني أنه متزوج وعنده 4 أولاد ، وأخبرني ان الضابط الذي اعتقله استولي علي الكمبيوتر بتاعه ، قلت في عقلي ، ومين اللي هيعوض ولادك ومراتك عن غيبتك دي ولا هيعوضك عن غبيتهم عن عينك، لم أستطع إلا أن أشاركه بدمعي الرخيص ، لأن هذا هو ما كل ما أملكه إلي الآن .

من 22 سنة ويومين

طريق يانفس تختريه

في عيد ميلادي افكرك

طريق لصالحك

أوطريق يشحورك

طريق نجاه

وطريق سلوكه يكفرك

ما في بدل إلا ارشدك

و اصبرك

أول طريقك ربنا

وبعده هدي نبينا

ثم اياس من غير هوي

وإن فيه هوي

يبقي اجتهاد اضمن لنا

ثاني طريقك الشيطان

مخلوق خبيث

مخلوق جبان

لَهْلْ الهوي كيده كوي

كيده ضيعف لَهْلْ الايمان

حطي كلامي كالحلأ

ثبتيه جوا الودان

واوعي تأمني بالمثل

كل وقت وليه ادان

كفايه إني بكلمك

واتهمت بالجنان

فياك تقولي لم نصحت

بنصح في أمك من زمان

****

طبعا مش هدحك عليكوا انا كاتب الموضوع عشان تقولولي " كل سنة وانت طيب وهابي بير زيت يووو شط شط شا " لأني أنا اتولدت من يومين مش قصدي من يومين بالظبط لكن من 22 سنة ويومين ، بعد مكتبت الأرجوزة اللي فوق واحد معرفة من السلفيين وربنا يجعلنا كلنا من أهل السنة قال بدل ما تفرح كده ازعل قيامتك قربت مش عارف الكلمة دي ديقتني ليه – يمكن عشان لسه مش عامل حسابي أو عشان بخاف من الموت - بس يلا بما انه عيد ميلاد الريس المنتظر لازم الريس يسامح من قلبه وفشته وكلوته وإلا هيبقي ريس هزء ولن أنكر جنون العظمة مش انا ريس بقي .

المسكوع بالقلم

لحد دلوقتي فاكر القلم ده ، مش عشان بكتب بيه لا عشان انا إنضربته في الدرس من بنت ، مدرسنا المتعصب كان يشترط علي البنت اللي تجاوب سؤال الولد تلدعه بالقلم ويّسَمَعْ ، طبعا أن مش هقولكم إني كنت أينشتين بس أهه كانت ماشية وكنت طالب متوسط ، المدرس سأل سؤال شاور عليا مجوبتش ، بنت عمي من بعيد جاوبت طلب المدرس إنها ترقعني بالقلم ، المشكلة إن الصبيان والبنات كانوا بيبصوا للواحد بنظرتين نظرة احتقار لأني اتسكعت من بنت ، ونظر شفة لأن الدنيا دواره والنهاردة قفاهم في السليم بكره ربك يسترهااا ، شعرت بدوار أثناء مراسم سكعي بالقلم ، لم يكن القلم مؤلم جسدياً بقدر أنه محطم نفسياً ، لم أعرف لما شعرت في ذلك الوقت بالخزي والعار والذل والمهانة ، ربما لو كان ولد وتفاخر عليا لصفيت حسابي معه بتنيمه علي الأرض وهوا يدألج شويه وأنا شوية مع إثارة بعض من التراب نتيجة صراع ثورين أحدهما متفاخر والثاني يحاول إخراج غضبه علي حد ، لكن ماذا اصنع مع بنت والأدهي إنها قريبتي ، لما عدت للبيت لا أتذكر هل أخبرتهم مباشرةً أم لوحظ انني متغير الحال والطبع ، كنت كل ما أراه أمامي أثناء غدوي ورواحي يافطة كبيرة مكتوب عليها " المسكوع بالقلم " ، وجدت المدرس بعد فتره يحاول أن يسألها أسئلة أكثر من اللازم كأنه يتعمد إيقاعها وينظر إلي ليعرف هل انا مهتم بالإجابة فإن رأني أحاول الهرب من عينه أشار علي زميل آخر وللأسف فوت كثير من الفرص لأخذ ثأري حتي لو من بنت لأني مش شاطر ، وبعد مده استطعت أن افك حاجز النحس وأجاوب وحان وقت الإنتقام ، وأنا اخطو نحوها شعرت بالغضب العارم يتدفق خلال أوتاري وأعصابي شعرت بالحقد الذي يتسلل من بين أناملي ولم أشعر إلا وأنا رافع يدي للسماء حتي أسكعها ،قال المدرس " إذا القلم جه جامد أن هردهولك 3 مش واحد " ، أخيراً أخدت بثأري ، شفيت غليلي ، وتنهدت تنهيدة ظننت أنها تدل علي الارتياح لكن لم أشعر بالراحة لأني إنضربت واللي حصل حصل .

قصصت الحكاية علي أحد معارفي رد وقالي " هو ده حاجة إحنا كان المدرس بيحبس اللي يغلط في بوكس الأرانب وأبوك وأمك يجي يخدوك آخرت النهار " تخيلت المتحدث وهوا مقرفص في القفص إبتسمت بخبث لتخيلي المنظر ، أكمل كلامه " والأدهي من ذلك إن لو انت غلطت يخلي حد يجاوب ويفضل انها تكون بت عشان لو جاوبت تتف في بقك " ردت في عقلي وقلت " كتك القرف إنت والأستاذ بتاعك " .

بعد 13 سنة من الحادثة وأثناء تندرنا أنا وأمي أخبرتني أن أبي ذهب للمدرس وأخبره أنه يجب أن أرد القلم لها لتأثري نفسياً ، وبربط الأحداث أدركت لما كان المدرس يسألها كثيراً محاولاً إيقاعها ، لما يا أمي أخبرتني فقد جعلت من الصفعة صفعتين .

مهما كان هيا بنت وأنا ولد !!!

كانت زيارتي لخالتي وأنا طفل ، بمثابة الخروج من عنق الزجاجة ، كانت الزجاجة هي قريتي والعنق الذهاب للمدينة عند خالتي ، كنا نسكن في شقه وكانت خالتي تمتلك شقه ، كنت أركب الخيل والحمير ، وكانت تركب السيارة ، كنت أفطر الماعز صباحاً قبل ذهابي للمدرسة ، وكانت خالتي تطعم البوبي ، كنت أستحم بالصابونه ، والبوبي يستحم بالشامبو ، وكان ذلك البوبي شاهق البياض كثير النباح رغم قصره الشديد ، وكان يبغضني لسبب لست أعلمه ، كان الذهاب لخالتي أقصي أمنياتي في تلك الفترة ، لأني أجد عندها ما لذ وطاب من طعام ومشروبات وشبسيات وأجهزة حديثة جداً وقتها فقد ظهر اختراع جديد يسمي كمبيوتر ، وليست المقارنة هنا حسداً بل إني كنت أحب خالتي حباً جماً ، وكنت أنا فخر أمي أمام الخالة و بنت الخالة التي تكبرني بعام ، أخبرت أمي خالتي أنني ألعب رياضة الكارتيه ، كنت ناقص أسمع أغنية – أنا أم البطل - ، تحدتني بنت الخالة لا أعلم لشعورها بالغيرة أو أنها تريد أن تثبت ضعفي حتي لو شربت لبن العصفور .

كل ما كان يخطر ببالي أنها مهما صنعت يجب ألا أقسو علي بنت خالتي كل ما يجب أن أثبته أنني لاعب كارتيه ، الكارتيه يبدأ بتحية الخصم بالنحناء أمامه ليس تعظيما ولكن إحتراماً ، لسه يدوب بنحني هوووووب ، لقيت شعري بيتشد وبنت خالتي بتجرب عليا دوخيني يا لمونه ، وهات يا تدويخ ، ويبدو إن اللمون كان كتير بالهبل ساعتها ، وكذلك النجوم التي تحلق فوق رأسي أو هكذا تخيلت من كتر الفرجة علي الكرتون ، كل ما أتذكره أنني في لحظات كنت طريح الأرض ، لا أتذكر هل ضربت ركله خلفيه أم أن ذلك الانبطاح كان من شد الشعر بس ، أتذكر أيضا ضحكات أمي وخالتي وتقريبا إدعائي أنني اللي سبتها عشان هيا " بنت " وأنا " ولد " وظلت بنت خالتي لفترة كاسره عيني بتذكيري بمنظري وأنا أسف تراب الأرض .. وأنا أطيب خاطر نفسي بقولي " المسامح كريم " أو هكذا إدعيت ، ويا بخت من بات مظلوم ومبتش ظالم ، انتوا مش معايا ولا ايه .